Олоҥхо педагогикатыгар инновационнай бырайыактар

"Тыа сирин оскуолата" өрөспүүбүлүкэтээҕи педагогическай дьаарбаҥкаҕа быйыл аан маҥнай Олоҥхо педагогикатыгар туспа секция үлэлээтэ.

Бу Олоҥхо бырагырааматын 10 сылын чэрчитинэн Саха Өрөспүүбүлэкэтин Олоҥхо 10 сылын тэрийэр Национальнай кэмитиэт (А.Н.Жирков), Өрөспүүбүлэкэтээҕи Олоҥхо Ассоциацията  (Ф.В.Габышева), Үөрэх Министиэристибэтэ (С.С.Татаринова) ыытар үлэлэрэ кэҥээн, дириҥээн, суолтата улаатан иһэрин көрдөрөр. Онуоха СӨ Национальнай оскуолаларын чинчийэр үнүстүтүүт (С.С.Семенова) олоҥхо педагогикатыгар научнай чинчийиилэрин түмүктэрэ сүрүн тирэх буолаллар.

Секция үлэтин кэмигэр 7 улуустан уонна Дьокуускай куораттан 39 бырайыак көмүскэннэ. Бырайыактар ис хоһоонноро Олоҥхо педагогиката үлэ араас хайысханан көдьүүстээхтик олоххо киирэрин көрдөрдүлэр. Билиҥҥи кэмҥэ оҕону кыра сааһыттан саҕалаан сиэр-майгы, өй-санаа өттүнэн сайдыылаах, этэ-сиинэ чэгиэн-чэбдик туруктаах улаатарыгар иитээччилэр, учууталлар олоҥхоттон сөптөөх ньымалары, технологиялары булан, ырытан, оҥорон туһаналлар. Онон араас хайысхаттан талыллан маннык үөрэх тэрилтэлэрэ бэлиэтэннилэр.

Сунтаартан "Чебурашка", Үөһээ Бүлүүттэн "Аленушка" оҕо саадтара, Өймөкөөнтөн Үчүгэй орто оскуолата компьютернай техниканан наҕараадаланнылар.

Маны таһынан Төхтүр, Хатас, Дүпсү, Тааттаттан "Арылы кустук" ситим, Бэрдьигэстээх, Чурапчы, Брорҕон, Баатаҕай оҕо саадтарыгар, Тарат, Баатаҕай, Төхтүр, Эҥэ, Дүпсү, Тулуна, Чурапчы орто оскуоларыгар анал сертификат, кинигэ кэмпилиэгэ туттарылынна.

Инникитин Олоҥхо иккис 10 сылынан сибээстээн өссө киэҥ, далааһыннаах дириҥ ис хоһоонноох үлэ былааннанар. Онон үөрэх тэрилтэлэрэ олоҥхо педагогикатыгар инновационнай бырайыактарын сайыннаран, уопуттарын тарҕатан, үѳрэх эйгэтигэр киллэрэн иhиэхтэрэ диэн эрэнэбит.