«Саха оскуолата» үөрэх тиһигэ уонна ФГҮӨС ирдэбилигэр сөп түбэһэр саҥа учуобунньуктар

25.01.2016 00:24

Саха Өрөспүүбүлүкэтин  национальнай оскуолаларын чинчийэр научнай институт 2004-2009 сыллаах чинчийиилэрин түмүгэр олоҕуран, «Саха оскуолата» үөрэтии тиһигэ олохтоммута.                 

«Саха оскуолата» үөрэтии тиһигин сыала – Арассыыйа гражданинын, Саха сирин олохтооҕун, саха киһитин иитэр-үөрэтэр оскуолаҕа көмө.                

Сүрүн сыалы ситиһии тосхоллоро:

• үөрэтии ис  хоһоонун ытык өйдөбүллэргэ тирэҕирэн таҥыы;
• олоҥхо педагогикатын үөрэх тиһигэр олохсотуу;
• федеральнай государственнай үөрэх стандарда саха оскуолатыгар ситиһиилээхтик киирэрин хааччыйыы;
• сахалыы үөрэх тылын олохсотуу;
• үөрэтии тэрээһинин тупсарар, тэтимин түргэтэтэр уонна үөрэх хаачыстыбатын үрдэтэр саҥа технологиялары киллэрии.                

«Саха оскуолата» үөрэтии тиһигэ үөрэх кэмпилиэгин нөҥүө олоххо киирэр. Кэнники сылларга Саха Өрөспүүбүлүкэтин үөрэҕин министиэристибэтин сакааһынан, Институт научнай чинчийиилэрин түмүгэр олоҕуран оҥоһуллубут үөрэх кинигэлэрэ:

    

«Төрөөбүт тыл»(автордар: С.С. Семенова, Н.Н. Васильева, Т.А. Скрябина). Үөрэх кинигэлэрин ис хоһооно федеральнай государственнай уопсай алын сүһүөх үөрэхтээһин стандардын туруорар ирдэбилигэр сөп түбэһэр. Үөрэнээччи сахалыы тэтимнээхтик ааҕар, чуолкайдык саҥарар, таба суруйар сатабылын, айан кэпсиир уонна суруйар үөрүйэҕин сайыннарарыгар көмөлөһөр. Тыл үөрэҕин систиэмэтин кытта билиһиннэрии тылы байытыы, этигэн тылга уһуйуу үлэтин кытта тэҥҥэ дьүөрэлэһиннэрэн ыытыллар. Эрчиллиилэр тиһиктэрэ үөрэнэргэ үөрэтэр, үөрэх дэгиттэр дьайыыларын олохсутар хайысхалаахтар.

«Литературнай ааҕыы» (автордар: Л.В. Захарова, У.М. Флегонтова). Үөрэх кэмпилиэгин ис хоһооно федеральнай государственнай уопсай алын сүһүөх үөрэхтээһин стандардыгар олоҕурар. Төрөөбүт норуотун тыынын иҥэриммит, атын норуоттар култуураларын сэргиир, айымньы нөҥүө олоҕу, дьону, тулалыыр эйгэни сыаналыыр айымньылаах ааҕааччыны иитиигэ ананар. Учуобунньуктар ис хоһоонноро учуутал ааҕыыга уонна кинигэҕэ кэрэхсибили үөскэтэр туһугар үөрэнээччигэ тус туһаайыылаах дьарыгы тэрийэригэр сөптөөх. Үөрэх кэмпилиэгэ 2014 сыллаахха учуобунньук федеральнай биэрэчинигэр киирбитэ. 2015 сыллаахха Бүтүн Арассыыйатааҕы куонкурус түмүгүнэн, «XXI үйэ учуобунньуга» үрдүк ааты ылбыта.