\ «Төрөөбүт тыл» 1-2 кылааска аналлаах үөрэх кэмпилиэгин сүрэхтэниитэ

Жизнь человека не вечна, но наука и знания переступают пороги столетий

 

И. Курчатов

«Төрөөбүт тыл» 1-2 кылааска аналлаах үөрэх кэмпилиэгин сүрэхтэниитэ

« Назад

24.02.2016 22:38

IMG-20160224-WA0019 Олунньу 24 күнүгэр Төрөөбүт тыл уонна сурук-бичик декадатын чэрчитинэн, «Саха оскуолата» үөрэх тиһигэр (систиэмэтигэр) киирэр саҥа үөрэх кинигэлэрэ сүрэхтэннилэр.  

«Саха оскуолата» тиһиги 2010 сыллаахха Национальнай оскуолалары чинчийэр научнай институт хас да сыллаах чинчийиитигэр тирэҕирэн, олоҥхо педагогикатын сүрүн тосхоллоругар олоҕуран төрүттээбитэ. Бу тиһик иһинэн оҥоһуллубут «Литература ааҕыыта», «Саха Өрөспүүбүлүкэтин норуоттарын култуурата» үөрэх кэмпилиэктэрэ  билигин оскуолаҕа туттулла сылдьаллар.

Быйылгы үөрэх дьылыгар Саха Өрөспүүбүлүкэтин Үөрэҕин министиэристибэтин сакааһынан, саха оскуолаларын 1 уонна 2 кылаастарыгар аналлаах «Букубаар» уонна «Төрөөбүт тыл» үөрэх кинигэлэрэ «Бичик» кинигэ кыһатыгар бэчээттэнэн,  оскуолаларга тарҕаммыттар.

Үөрэх кинигэлэрин сүрүн ис хоһоонноро федеральнай государственнай үөрэх стандарда төрөөбүт тылы 1-4 кылааска үөрэтиигэ туруорбут ирдэбиллэригэр сөп түбэһэллэр. Үөрэнээччини ийэ дойдуну, айылҕаны, дьиэ кэргэни, төрүт култуураны, үлэни онтон да атын үйэлээх өйдөбүллэри ытыктыырга, бэйэ-бэйэни кытта бодоруһарга, сэһэргэһэргэ, таба саҥарарга, ааҕарга,  суруйарга, төрөөбүт тылы  мэлдьи сайыннарарга уонна харыстыырга үөрэтэллэр. Тыл үөрэҕин, сурук-бичик култууратын төрүт өйдөбүллэригэр тирэҕирэн,  үөрэнээччи толкуйдуур дьоҕурун сайыннарар аналлаахтар.

Үөрэх кинигэлэрин ааптардар Национальнай оскуолалары чинчийэр научнай институт үлэһиттэрэ педагогическай наука кандидата Светлана Степановна Семенова, Надежда Николаевна Васильева уонна уопуттаах учууталлар Мария Филипповна Кронникова, Татьяна Артамоновна Скрябина хас да  сыл айымньылаахтык бииргэ үлэлээн оҥорбуттар.  Кинигэ матырыйаалларын  Саха гимназиятыгар, Дьокуускай куоратааҕы национальнай гимназияҕа, Чурапчы улууһун оскуолаларыгар хас да сыл    үөрэх усулуобуйатыгар  бэрэбиэркэлээбиттэр.

"Бичик" национальнай кинигэ кыһатыгар  үөрэх кинигэлэрэ тупсаҕай көрүҥнээх, туттарга дьоҕус гына оҥорор  туһугар  эрэдээктэрдэр Марина Гавриловна Макеева, Александра Дмитриевна Попова, Марина Георгиевна Никифорова, худуоһунньуктар Надежда  Николаевна Николаева Ябловская  Ньургуйаана Егоровна, техническэй эрэдээктэр Кириллина Александра Львовна,   көмпүүтэринэн таҥыыга   Анна Васильевна Гоголева, Марта Николаевна Кардашевская о.д. а.   кыһамньыларын уурбуттар.   

Салгыы 3-4 кылааска аналлаах үөрэх кинигэлэрэ тахсыахтара. Ол кэннэ үөрэх кэмпилиэгэ учуобунньук федеральнай испииһэгэр  киирэригэр өссө тупсарыллан  иккистээн тахсыаҕа, электроннай сыһыарыылар оҥоһуллуохтара, учуобунньуктар учууталларга аналлаах методическай босуобуйалаах буолуохтара.

Үөрэх кинигэлэрин сүрэхтэниитигэр Үөрэх министиэристибэтиттэн Туйаара Семеновна Абрамова, рецензент - Гуманитарнай чинчийии уонна Хотугу аҕыйах ахсааннаах төрүт омуктар кыһалҕаларын чинчийэр үнүстүтүүт кылаабынай научнай үлэһитэ, филологическай наука дуоктара  Николай Николаевич Ефремов,  Дьокуускайдааҕы педагогическай колледж, Педагогическай институт преподаватэллэрэ, учууталлар, үөрэнээччилэр, төрөппүттэр бэйэлэрин санааларын эттилэр.


Комментарии


Комментариев пока нет

Добавить комментарий *Имя:


*E-mail:


*Комментарий: